Gwaith Cymdeithasol Oedolion
yng Nghaerdydd
Dinas fywiog, arfer amrywiol.

Mae’r Gweithwyr Cymdeithasol hyn wedi’u lleoli mewn ysbytai neu yn y gymuned i gefnogi unrhyw un dros 18 oed sydd ag angen gofal a chymorth. Mae’r tîm yn cynnig gwasanaethau o’r tro cyntaf y mae angen cymorth ar unigolyn neu deulu a thrwy gydol ei daith gyda ni.

Caiff ein Gweithwyr Cymdeithasol eu cefnogi gan dîm amlddisgyblaethol ehangach i ddod o hyd i’r atebion gorau i helpu pobl. Gall y tîm gynnwys:

• Timau Therapi Galwedigaethol yn y Gymuned ac mewn Ysbytai,
• Cynorthwywyr Gwaith Cymdeithasol,
• Timau Adnoddau Cymunedol,
• Gwasanaethau Lles,
• Canolfannau Dydd, a
• chydweithwyr iechyd.

Mae gennym berthnasau cytundebol gydag ystod eang o ddarparwyr gofal cartref a chartrefi gofal preswyl yng Nghaerdydd, gan gynnig amrywiaeth o opsiynau i fodloni anghenion unigolyn.
O fewn y Gwasanaethau Cymunedol Oedolion, mae 3 thîm craidd sy’n sicrhau bod pobl yn cael cymorth yn y lle iawn ar yr adeg iawn.

Adult and Community Services Teams:

• Tîm Rheoli Achosion – ar gyfer unigolion ag anghenion cymhleth.
• Tîm Gwaith Cymdeithasol Pwynt Cyswllt Cyntaf neu Asesu Oedolion – sy’n cynnwys Gweithwyr Cymdeithasol yn y Gymuned neu mewn Ysbytai sy’n cynnal asesiadau gydag unigolion i nodi anghenion gofal a chymorth.
• Tîm Adolygu – sy’n rhoi cymorth i unigolion drwy gynnal adolygiadau ac asesiadau i sicrhau bod eu gofal a’u cymorth yn parhau’n addas.

Mae ein Gwasanaethau Cymorth Arbenigol ac Iechyd Meddwl yn cefnogi amrywiaeth o unigolion, gan gynnwys pobl sy’n profi:

• anawsterau iechyd meddwl,
• problemau camddefnyddio cyffuriau ac alcohol, a
• digartrefedd.

Mae’r timau’n gweithio gyda phartneriaid gan gynnwys Bwrdd Iechyd Prifysgol Caerdydd a’r Fro (BIPCaF) a sefydliadau yn y trydydd sector i ddarparu gwasanaethau i unigolion a theuluoedd i’w helpu gyda’r heriau sy’n eu hwynebu a rhoi cymorth parhaus.

Mae’r timau’n gweithio’n agos gyda chydweithwyr yn y meysydd Diogelu Oedolion a Thai ac yn BIPCaF.

Gwasanaethau Cymorth Arbenigol ac Iechyd Meddwl:

Timau Iechyd Meddwl Cymunedol (TIMCau)

Mae 5 TIMC yng Nghaerdydd yn darparu ymyriadau amlddisgyblaethol mewn partneriaeth â BIPCaF i gefnogi pobl sy’n byw gydag anawsterau iechyd meddwl ledled y ddinas.

Gwasanaethau Iechyd Meddwl i Bobl Hŷn (GIMBH)

Rhan o’r tîm amlddisgyblaethol dan y trefniadau partneriaeth rhanbarthol gyda BIPCaF i roi cymorth i ddinasyddion a theuluoedd sy’n byw gyda chyflyrau iechyd meddwl sy’n gysylltiedig ag oedran.

Tîm Dyletswydd Argyfwng

Mae hwn yn drefniant partneriaeth rhanbarthol gyda Chyngor Bro Morgannwg, sy’n cael ei gynnal a’i reoli gan Gyngor Caerdydd, i gynnig ymateb gwasanaethau cymdeithasol tu-allan-i-oriau i bob dinesydd ar draws y ddwy ardal awdurdod lleol gan gydweithio ag asiantaethau partner a gwasanaethau argyfwng eraill.

Tîm Trefniadau Diogelu rhag Colli Rhyddid (TDCRh)

Trefniant partneriaeth gyda BIPCaF a Chyngor Bro Morgannwg i sicrhau bod y mesurau diogelu cyfreithiol priodol ar waith ar gyfer hawliau dinasyddion nad ydynt yn gallu cydsynio i’w gofal a’u triniaeth.

Tîm Fforensig

Tîm arbenigol annibynnol sy’n rhoi cymorth, mewn partneriaeth â BIPCaF, i unigolion sy’n destun cyfyngiadau’r Weinyddiaeth Gyfiawnder (GG) ac sydd ag anawsterau iechyd meddwl hefyd.

Y Tîm Niwroseiciatreg

Dyma wasanaeth adsefydlu arbenigol Cymru gyfan a reolir gan BIPCaF ar gyfer oedolion sydd ag anafiadau caffaeledig i’r ymennydd ac anawsterau iechyd meddwl cysylltiedig. Mae’n cynnig mewnbwn gweithwyr cymdeithasol arbenigol i ddinasyddion Caerdydd sy’n agored i’r gwasanaeth hwn.

Tîm Alcohol a Chyffuriau Caerdydd, Tîm Gwaith Cymdeithasol Canol y Ddinas, Gwasanaeth Pontio a Thîm Niwroamrywiol

Dyma ystod o wasanaethau arbenigol i ddinasyddion Caerdydd sy’n profi anawsterau gan gynnwys problemau camddefnyddio sylweddau, digartrefedd a phobl ifanc sydd ag anghenion gofal a chymorth sy’n gadael gofal. Mae’r timau hyn yn gweithio gydag amrywiaeth o bartneriaid gan gynnwys BIPCaF, sefydliadau yn y trydydd sector a gwasanaethau Tai.

Gwasanaeth Dydd Tŷ Canna

Tîm arbenigol annibynnol sy’n cynnig ystod o gymorth gan gynnwys mewnbwn un-i-un, gweithgareddau grŵp, hyfforddiant galwedigaethol, cwnsela a chymorth cyfoedion i bobl sy’n profi anawsterau iechyd meddwl ac sy’n agored i wasanaethau iechyd meddwl eilaidd.

Mae 2 Dîm Anableddau Dysgu sy’n cynnig cyngor gwaith cymdeithasol, gwybodaeth a gwasanaethau cymorth i oedolion sydd ag Anableddau Dysgu a’u gofalwyr. Maent yn gweithio’n agos gyda thimau amlddisgyblaethol ehangach i gefnogi anghenion cymhleth parhaus.

Gan fod Caerdydd yn ddinas gryno gyda chysylltiadau trafnidiaeth da, mae gennym ystod eang o gyfleoedd i gefnogi oedolion sydd ag anableddau dysgu.  Mae ein dull gweithredu yn sicrhau ein bod yn canolbwyntio ar gefnogi pobl i gael mynediad at weithgareddau lleol ac i integreiddio i’w cymunedau.  Rydym yn gweithio’n agos gyda’n tîm iechyd anableddau dysgu ac asiantaethau eraill i sicrhau ein bod yn bodloni anghenion pobl.

Mae cyfleoedd i’n staff weithio gyda phobl ag ystod eang o anghenion ac arbenigo mewn maes sydd o ddiddordeb, fel pontio neu ddiagnosis deuol (mae gennym nifer o aelodau o staff sydd wedi dewis hyfforddi fel Gweithwyr Proffesiynol Iechyd Meddwl Cymeradwy), os ydynt yn dymuno. Mae llawer o aelodau o staff sy’n ymuno â ni dros dro yn dewis aros a dilyn gyrfa yng Nghaerdydd.  Mae hyn oherwydd y cyfleoedd i fod yn greadigol, ein gwasanaethau lleol sydd o ansawdd uchel, dull gweithredu cefnogol a chyfeillgar ein timau a’n brwdfrydedd dros hyrwyddo hawliau a lles unigolion.

Mae ein staff yn gweithio gyda phobl i ddeall ac asesu eu hanghenion a’u canlyniadau fel y gallwn ddatblygu opsiynau sy’n canolbwyntio ar yr unigolyn.

Mae ein tîm o Gynllunwyr Cymorth yn gweithio’n agos gydag unigolion sydd ag anghenion cyfleoedd dydd. Maent yn eu helpu i nodi amrywiaeth o gyfleoedd meithrin sgiliau a chyfleoedd eraill, gan gynnwys:

• grwpiau prif ffrwd,
• cyfleoedd gwirfoddoli,
• addysg i oedolion,
• astudiaethau galwedigaethol, a
• gwasanaethau dydd mwy arbenigol.

Mae hyn yn arwain at becynnau pwrpasol a rhwydweithiau gwell i unigolion. Mae gan y tîm fynediad i dros 80 o gyfleoedd lleol ac mae’r nifer hwn yn cynyddu.

Mae’r Cyngor wedi datblygu gwasanaeth dydd anghenion cymhleth i’r unigolion hynny sydd ag anghenion iechyd neu ymddygiad hynod gymhleth. Mae’r gwasanaeth yn un cymunedol ac yn canolbwyntio ar ddatblygu sgiliau a sicrhau’r ymarfer lleiaf cyfyngol. Rydym wedi datblygu’r gwasanaeth hwn ymhellach ar gyfer pobl ifanc sy’n pontio ac rydym yn gweithio ochr yn ochr â chydweithwyr addysg i ddatblygu ein cyrsiau addysg bellach lleol.

Rydym yn cynnig seibiant dros nos trwy wasanaethau gyda dwy elusen leol ac rydym yn cynllunio tŷ seibiant pwrpasol newydd i gynnig mwy o ddewis i’r bobl rydym yn eu cefnogi.

Mae cefnogi pobl i aros yn lleol, gan fyw yn agos at eu teuluoedd a’u rhwydweithiau a chyda’u tenantiaeth eu hunain yn bwysig iawn i ni. Mae hyn wedi arwain at ddatblygu 112 o gynlluniau lleol gan gynnwys amrywiaeth o dai a fflatiau gyda chefnogaeth ar y safle. O fewn ein gwasanaeth, mae gennym dîm byw â chymorth sy’n goruchwylio ac yn monitro ein contractau byw â chymorth. Mae’r tîm hefyd yn rheoli eiddo gwag a symudiadau gan sicrhau y gall gweithwyr cymdeithasol ganolbwyntio ar gefnogi’r unigolion wrth symud. Mae’r rhan fwyaf o’r cynlluniau yn cael eu rhedeg gan elusennau yn y trydydd sector. Rydym hefyd yn gweithio’n agos gyda darparwr lleoliadau oedolion a darparwyr gofal preswyl arbenigol yn ôl yr angen.

Rydym wedi cydgynhyrchu strategaeth gomisiynu gyda phobl leol i gytuno ar gyfeiriad y gwaith o ddatblygu gwasanaethau ac rydym yn ystyried sut y gallwn adeiladu ar gydgynhyrchu wrth symud ymlaen.